إنت عارف أنك تسامح حد ده شيء مش سهل .آه مش سهل خالص .طبعا في كتير هيرد عليا إن ده سهل وأن التسامح من صفات الرجال العظماء اللي عندهم كرم ونبل أخلاق .
ده كلام صح بس معظمنا لسه موصلش للدرجة دي وفكر معايا شوية.
فكر كده فى الشخص اللي أهانك أو ضايقك أو اعتدى عليك بأي شكل أو أحرجك في موقف معين أو نصب عليك أو حتى أستهتر بيك ولو دقيقة واحدة.
إنت متخيل الشعور بالغليان جوه نفسك أو إحساسك بالظلم اللي وقع عليك أو على عزيز عندك زي أمك أو زوجتك أو أخوك أو إبنك ,أكيد مش هيعدي عليك كده هباء منثورا.
إنفعالك جوه نفسك هيولد عندك مشاعر سلبيه أو رغبة إنتقام أو غضب شديد أو تهور مبالغ فيه.
الخلاصة ده هيسيطر عليك كليا وده هيظهر فعليا على وجهك وجسدك.
كل ده بيستهلك طاقتك وجهدك و افكارك “طب فين التسامح ” لسه شوية ..
دلوقتي انت كل اللي محتاجه انك تفرغ كل اللي متخزن جواك , كل اللي انت كاتمه, عاوز تصرخ أو تنتقم بأي شكل , عاوز تطلع كل الكلام اللي اتحشر في حلقك أمام اللي أهانك.
مش هتسمع لأي توجيه ديني أو منطقي في اللحظة دي أو بسرعة كده .
هيبقى قدامك حلول للحالة الصعبة اللي انت فيها دي: منها أنك ترجع بالزمن للموقف أو المشكلة ويكون رد فعلك مناسب وصحيح وتتخلص بقى من الاحساس الفظيع ده وهترتاح نفسيا بس دي مستحيل تعملها .أو انك تروح للشخص وتنهي معاه الموقف وتقول او تعمل اللي كان نفسك تعمله وتخليك جدع وشجاع كده وترتاح برضه نفسيا. أو انك تصفح وتسامح في كل اللي حصلك وتكون أولا من الكاظمين الغيظ وبعدها مرحلة العافين عن الناس بس ده طبعا مش هتوصله في يوم وليلة, لأن ده محتاج درجة عالية من النمو النفسي ومنزلة مرتفعة من السلام الداخلي ومش كل الناس تقدر تعمل كده.
بعض الناس ممكن تعمل كده بس بعد المواجهة أو محاولة رد الكرامة بعض الشيء .
لازم تعرف أن التسامح يعني صفاء النفس وكل اللي جواك نسيته فعلا وبدلته بقلب سليم بيصلي وبيصوم لربنا وهو خالي أبيض مطمئن , لو وصلت لكده يبقى انت فعلا شخص متسامح مع نفسك ومع الاخرين.
عرفت دلوقتي أن الموضوع صعب وان التسامح مش كلمة تنطق باللسان وخلاص .
التسامح يصنع حياة. آه يصنع حياة وهقولك إزاي , عشان لو إستسلمت لإنفعالاتك اللي بينتج عنها أفكار سلبية وحشية نتيجة القهر والظلم ده هيؤدي الى مشاحنات ودمار وقطع علاقات وفساد كبير في المجتمع. عشان كده دعوة المظلوم لا ترد من الله . تعرف ليه لا ترد من الله؟ عشان ربنا وحده عالم بما يدور في نفسه من مشاعر واحاسيس صعبة.
التسامح مأوى نفسي وجداني بمعنى لما شخص يقولك أنا سامحتك لأجل الله هو بكده هينال من عند الله أفضل مما سوف يناله لو رد الاهانة او الظلم .
في الاخير لو سامحت او بمعنى أدق لو اتعلمت ازاي تسامح انت كده شخص كويس وعندك نبل اخلاق بس تعرف ان في اصعب وأفضل من التسامح .
عارف ايه هو ….
أنك تكون من المحسنين يعني مش بس تعفو وتسامح لا ده كمان تحسن وتكرم من أساء إليك وده اعلى درجات التسامح وصفاء القلب والنضج النفسي , وده برضه أكيد مش سهل.
محمد رجب زكي.( مصر)
(
(
